Հոնքերի բարձրացման նախնական խորհրդատվության ժամանակ հարցում է կատարվում բժշկական պատմության մասին՝ որոշելու, թե արդյոք վիրահատությունը լրացուցիչ ռիսկեր է ներկայացնում: Կատարվում է նաև դեմքի ֆիզիկական հետազոտություն՝ որոշելու բուժառուի համար վիրահատության լավագույն  տարբերակը։

Ծխողները պետք է դադարեցնեն ծխելը վիրահատությունից մի քանի ամիս առաջ, քանի որ ծխելը կարող է դանդաղեցնել արյան հոսքը և խանգարել սահուն ու արագ ապաքինմանը: Վիրահատությունից երկու շաբաթ առաջ պետք է խուսափել ասպիրին և հակաբորբոքային դեղեր պարունակող դեղամիջոցներից, քանի որ դրանք կարող են արյունահոսություն առաջացնել:

Բոլոր նրանք, ովքեր ենթարկվում են ընդհանուր անզգայացման, պարտավոր են ծոմ պահել (առանց ուտելիքի, ջրի, ծխախոտի) վիրահատությունից 7 ժամ առաջ: Կարևոր է նաև վիրահատության օրը չօգտագործել կոսմետիկա և քսուքներ, նաև նախապես կազմակերպել, որ ինչ-որ մեկը ուղեկցի ձեզ բժշկական հաստատություն, ապա տուն։ 

Հոնքերի բարձրացման վիրաբուժական միջամտության ժամանակ ցավի զգացողությունը բացառելու համար տրվում է անզգայացում։ Կախված հոնքերի բարձրացման պրոցեդուրայից՝ հնարավոր է տեղային անզգայացում ստանալ՝ թմրեցնելու ճակատի այն հատվածը, որտեղ կատարվում է պրոցեդուրան, կամ ընդհանուր անզգայացում:

Անզգայացումից հետո կտրվածք է կատարվում մաշկի վրա՝ մազերի եզրագծի ուղղությամբ: Նրանք շարժում են հյուսվածքները և հեռացնում մկանների ու մաշկի այն հատվածները, որոնք առաջացնում են կնճիռներ կամ խոր գծեր:

Կտրվածքները փակվում են կարերով: Վիրահատված հատվածում տեղադրվում է վիրակապ՝ կարերը պաշտպանելու համար:

Հոնքերի բարձրացման վիրահատությունը կարող է տևել 1-3 ժամ: 

Հոնքերի բարձրացումից հետո վերականգնումը անհատական է և կախված է օգտագործվող տեխնիկայից: Տրվում են համապատասխան խորհուրդներ, թե որքան ժամանակ է պահանջվում աշխատանքից բացակայելու համար․ հանգստի և ապաքինման համար սովորաբար բավարար է 1-2 շաբաթը:

Վիրահատությունից հետո կապտուկներն ու այտուցները սովորական են, վիրակապը պետք է կրել առաջին 24 ժամվա ընթացքում: Գոյություն ունեն այտուցը նվազեցնելու եղանակներ, օրինակ՝ առաջին շաբաթվա ընթացքում 2-3 բարձով բարձր դիրքով քնելը և ախտահարված հատվածներին սառույցի տոպրակներ տեղադրելը:

Վիրահատությունից հետո առաջին 24 ժամվա ընթացքում պետք է խուսափել ցնցուղ ընդունելուց: Դրանից հետո դուք կարող եք օգտագործել մանկական շամպուն ձեր մազերը լվանալու համար, բայց դուք պետք է մանրակրկիտ չորացնեք վերքերի հատվածը, որպեսզի կանխեք վարակի զարգացումը:

Վիրահատվածը երկու շաբաթվա ընթացքում պետք է խուսափի ինտենսիվ վարժություններից, ծանրության բարձրացումից կամ սեռական հարաբերությունից: Այնուամենայնիվ, շրջանառությունը բարելավելու համար կարևոր է լինել մի փոքր  շարժուն և թեթև քայլել:

Կարերը հեռացվում են վիրահատությունից մոտավորապես տասը օր հետո․ կազմակերպվում է հետագա խորհրդատվություն՝ առաջընթացը գնահատելու և պատշաճ ապաքինումն ապահովելու համար:

Կտրվածքի գծերը նույնպես ժամանակի ընթացքում ավելի քիչ տեսանելի կդառնան, և ձեր գոհունակությունը նոր տեսքից կմեծանա, երբ վերականգնվեք վիրահատությունից հետո: Վիրահատության վերջնական արդյունքները տեսանելի կլինեն մի քանի ամսվա ընթացքում։

Թեև լավ արդյունքներ են ակնկալվում պրոցեդուրայից, երաշխիք չի կարող լինել: Ամբողջ կյանքի ընթացքում արևից պաշտպանվելը օգնում է պահպանել երիտասարդ տեսքը՝ նվազագույնի հասցնելով արևի ճառագայթների վնասակար ազդեցությունը: Առողջ ապրելակերպը նույնպես նպաստում է վիրահատության արդյունքները տևական դարձնելուն։