Նախքան ընթացակարգը պետք է խորհրդակցել օտորինոլարինգոլոգի, ապա վիրաբույժի հետ։

• Նախքան վիրահատությունը կազմակերպվում է հանդիպում պլաստիկ վիրաբույժի հետ, ով ուսումնասիրում է դեպքի առանձնահատկությունները, լուսանկարում և խոսում հակացուցումների մասին: 
• Պատրաստ եղեք պատասխանելու անցյալ վիրահատությունների և ընթացիկ կամ նախկին բժշկական վիճակի, ինչպես նաև օգտագործած կամ օգտագործվող դեղամիջոցների վերաբերյալ հարցերին: 
• Բուժման տարբերակները որոշելու համար բժիշկը ուսումնասիրում է ականջները՝ ներառյալ դրանց դիրքը, չափը, ձևը և համաչափությունը: 
• Քննարկեք ակնկալիքները: Բժիշկը հավանաբար կհարցնի, թե ինչու եք ցանկանում կատարել օտոպլաստիկա և ի՞նչ արդյունքներ եք ակնկալում: Համոզվեք, որ հասկանում եք օտոպլաստիկայի ռիսկերը։
• Պետք է խուսափել ասպիրինից, հակաբորբոքային դեղերից և բուսական հավելումներից, որոնք կարող են մեծացնել արյունահոսության ռիսկը: Բացի այդ, ծրագրե՛ք, որ ինչ-որ մեկը ուղեկցի վիրահատությունից հետո և մնա ձեզ հետ հետվիրահատական առաջին գիշերը:

Վիրահատությունը կարելի է կատարել ինչպես ընդհանուր, այնպես էլ տեղային անզգայացմամբ․ դա կախված է տարիքից և վախերի առկայությունից։ Մինչև 10 տարեկան երեխաների դեպքում օտոպլաստիկան կատարվում է ընդհանուր անզգայացմամբ։ 10 տարեկանից մեծ երեխաների դեպքում, կախված երեխայի խառնվածքից, կարելի է քննարկել նաև տեղային անզգայացմամբ վիրահատելու նպատակահարմարությունը։ Չափահաս տարիքում վիրահատության համար տեղային անզգայացումը լիովին բավարար է, եթե պացիենտը չունի խիստ արտահայտված վախեր (ֆոբիաներ)։

Օտոպլաստիկան սովորաբար ամբուլատոր միջամտություն է: Այն կարող է տևել 1-3 ժամ՝ կախված ընթացակարգի առանձնահատկություններից և բարդությունից:

Բոլոր կտրվածքներն արվում են ականջի հետևում․ վիրահատությունից հետո տեսանելի սպիներ չեն լինում։ Եթե ականջները դեպի դուրս են ծալված, ապա հնարավոր է դրանք հետ շրջել։ Եթե բացակայում են ականջախեցու որոշ բնական ծալքեր, ապա դրանք հնարավոր է «ստեղծել» ականջի կամ մարմնի այլ հատվածից վերցված հյուսվածքներից։ Վնասված կամ հաստացած ականջախեցիները կարող են վերականգնվել կամ բարակեցվել։ Վիրահատության ավարտին ականջ(ներ)ին դրվում է ճնշող վիրակապ վերականգնման փուլում դրանք ֆիքսված պահելու նպատակով։

Հետվիրահատական շրջանը կախված է անզգայացման տեսակից։ Ընդհանուր անզգայացման դեպքում հետվիրահատական շրջանը մի փոքր ավելի ծանր է, իսկ տեղային անզգայացման դեպքում բուժառուն նույն օրը կարող է գնալ տուն։

Վիրահատությունից հետո սովորաբար լինում է մի փոքր ցավ կամ կապտուկ։ Այտուցների անցնում են  մոտ մեկուկես շաբաթից՝ չնայած այն հանգամանքին, որ ականջի տվյալ հատվածը մոտ երեք շաբաթ մնում է զգայուն։ Ճնշող վիրակապը հանվում է 7 օր անց։ Ականջները ևս վիրահատությունից հետո 2-3 շաբաթ թմրած են լինում, սակայն այդ փուլում զգայունությունը կամաց-կամաց վերականգնվում է, իսկ այտուցները անցնում են 2 ամիս հետո: Ամբողջական վերականգնումը տևում է մոտ 5-6 ամիս:

 Հիմնականում այդ թմրության շնորհիվ է օտոպլաստիկայի վերականգնման փուլն ընթանում անցավ, ինչն էլ վերջինիս դարձնում է բացառապես տանելի հենց երեխաների մոտ։

Ի տարբերություն պլաստիկ այլ վիրահատությունների՝ օտոպլաստիկայի դեպքում պրոցեդուրայից հետո արդյունքն անմիջապես երևում է: 

Հետվիրահատական առաջին 10 օրերը խորհուրդ է տրվում անցկացնել տանը: Այս ժամկետում արգելվում է գլուխը լվանալ․ թրջելը կարող է որոշ բարդությունների պատճառ դառնալ: