Վիրահատության նախապատրաստումը սկսվում է բժշկական լիարժեք հետազոտություններից և ավարտվում հետվիրահատական ընթացքի վերաբերյալ բազմակողմանի խորհուրդներով։ Անհրաժեշտ են լաբորատոր մի շարք հետազոտություններ՝ առողջական ընդհանուր վիճակը գնահատելու համար։ Խորհուրդ է տրվում դադարեցնել ծխելը, չափավորել ալկոհոլի, ինչպես նաև հոգեմետ և հորմոնալ դեղերի օգտագործումը։ Հատկապես կարևոր է 10-14 օր առաջ մինչև վիրահատությունը ձեռնպահ մնալ արյան մակարդելիությունը իջեցնող դեղորայքի (օրինակ՝ ասպիրին) կիրառումից ։ Վիրահատության նախապատրաստման ժամանակ կարևոր է նաև համատեղ քննարկել բուժառուի սպասումները և իրական ակնկալիքները։

Եթե  վիրահատությունը կատարվում է ընդհանուր անզգայացմամբ, ապա անհրաժեշտ է դադարեցնել սննդի օգտագործումը վիրահատությունից առնվազն 6 ժամ առաջ։

Կոպերի պլաստիկան համեմատաբար անցավ վիրահատություն է, որն իրականացվում է տեղային կամ ընդհանուր անզգայացմամբ։ Վիրահատության տեխնիկան ամեն բուժառուի համար անհատապես է ընտրվում և պայմանավորված է վիրահատական պլանով։ Անզգայացման տեսակը կախված է պացիենտի ցանկությունից և կատարվող միջամտության ծավալից։ Անեսթեզիոլոգը ապահովում է լիարժեք ցավազրկումը, երաշխավորում անվտանգությունը և հետվիրահատական նվազագույն դիսկոմֆորտը։ Ամբողջ գործընթացը տևում է 1-1,5 ժամ՝ կախված ծավալից։

Տարբերակում են վերին և ստորին բլեֆարոպլաստիկա։ Սովորաբար ավանդական ձևով (նշտարով) կատարվում են կտրվածքներ վերին կոպի բնական ծալքի մակարդակով։ Դրանք տեղակայվում են կոպի երկայնքով՝ ներքին անկյունից դեպի արտաքին եզր։ Ցանկալի արդյունքի հասնելու նպատակով հեռացվում են ավելորդ մաշկը և ճարպը։ Վերին կոպերի կախվածությունը հաճախ պայմանավորված է լինում ոչ միայն կոպի, այլ նաև ճակատային մաշկի ավելցուկով, որով պայմանավորված՝ կախված են լինում նաև հոնքերը։ Նման դեպքերում լիարժեք արդյունք ստանալու նպատակով կարիք է զգացվում բարձրացնելու նաև հոնքերի գիծը։ Լավագույն արդյունքը այս ժամանակ ապահովում է բլեֆարոպլաստիկան՝ ճակատի էնդոսկոպիկ ձգումով զուգակցված։ Արդյունքում շտկվում և հեռացվում է կոպի ավելորդ մաշկը, բարձրացվում են կախված հոնքերը, հարթեցվում է ճակատի մաշկը։

Ստորին կոպերի պլաստիկայի ժամանակ կտրվածքը կատարվում է թարթիչների եզրագծով կամ կոպի ներքին մակերեսից։ Այս տեսակի կտրվածքը անվանվում է տրանսկոնյունկտիվալ։ Սա ավելի ժամանակակից մեթոդ է և չի թողնում ոչ մի տեսանելի սպի։ Ստորին կոպերի շրջանում տեղի է ունենում փափուկ հյուսվածքների իջեցում՝ մկանների և մաշկի՝ ժամանակի ընթացքում թուլանալու պատճառով։ Այս փոփոխությունները արտահայտվում են ստորին կոպի կախվածության, հարակնային մկանի ավելցուկի, աչքի տակ պարկերի առաջացման տեսքով, երբ ակնակապիճի մեջ թուլացած մկանի և փակեղի պատճառով հարակնային ճարպը այլևս չի ֆիքսվում։ Հաշվի առնելով առկա փոփոխությունները՝ ընտրվում է առավելապես ցուցված վիրահատության տեխնիկան։ Եթե անհրաժեշտ է հեռացնել մաշկի ավելցուկը և ճարպային ճողվածքները (գրիժա), ապա կտրվածքը կատարվում է թարթիչների տակից։

Կտրվածքից հեռացվում են ավելորդ ճարպը և մաշկը։ Եթե մաշկի ավելցուկ չկա, կտրվածքը արվում է տրանսկոնյունկտիվալ եղանակով։ Նման մոտեցումը իդեալական է երիտասարդների համար․ նրանց պետք չէ մաշկ հեռացնել․ առկա են միայն աչքի տակի պարկերը։ Ճարպի ավելցուկները հեռացվում են լազերով։ Հաջորդիվ կտրվածքը կարվում է շատ փոքրիկ կարերով, որոնք հեռացվում են ամենաուշը մեկ շաբաթից։ Կարող են լինել կապտուկներ, որոնք անցնում են մեկ շաբաթից։ Վիրաբուժական ոչ մի առանձնահատուկ խնամք չի պահանջվում։

Վերին և ստորին կոպերի շրջանում՝ անմիջապես մաշկի տակ, տեղակայված է մկանը, իսկ մարմնի մյուս հատվածներում՝ ճարպային բջջանքը։ Շնորհիվ այդ յուրահատկության՝ վերին և ստորին կոպերի արյան մատակարարումը առավել լավն է, և ապաքինումը տեղի է ունենում ավելի արագ։ Վիրահատությունից հետո  աչքերի վրա տեղադրվում են վիրակապ և 5-6 ժամով սառը թրջոցներ։ Մեծամասամբ նշանակվում են աչքի հակաբակտերիալ կաթիլներ։

Կարերը հեռացվում են 3-7 օրվա ընթացքում։ Կարերի գծով կիրառվում են կպչող պաշտպանիչ սպեղանիներ։ Բուժառուների մեծամասնությունը 7-10 օր հետո ազատ դուրս է գալիս տնից՝ անպայման օգտագործելով արևայրուքից պաշտպանող քսուքներ։ Կոնտակտային լինզաների կրումը և կոսմետիկայի կիրառումը խորհուրդ չեն տրվում 2 շաբաթ։ Բարակ հետվիրահատական սպիները գունաթափվում են և լիովին ներծծվում 2-3 ամսից։ Կապտուկները անցնում են շատ ավելի արագ՝ 10-12 օրից։

Վերականգնման նախնական շրջանում պետք է ձեռնպահ մնալ ֆիզիկական ծանրաբեռնվածությունից և սեքսուալ կյանքից։ Պետք է բացառել ալկոհոլային խմիչքները, ծխելը և հեռուստացույցի դիտումը հետվիրահատական վաղ շրջանում։