Արմատախողովակների բուժումը անհրաժեշտ է, երբ ատամնաբուժական ռենտգենը ցույց է տալիս, որ պուլպը վնասվել է բակտերիալ վարակի պատճառով:

Պուլպը կարող է բորբոքվել, եթե այն վարակված է բակտերիայով, ինչը թույլ է տալիս բակտերիաներին բազմանալ և տարածվել:

Պալպային վարակի ախտանիշներն են՝

• ցավ տաք կամ սառը սնունդ և խմիչքներ ուտելիս կամ խմելիս,
• ցավ կծելու կամ ծամելու ժամանակ։

Վարակի զարգանալուն զուգահեռ այս ախտանշանները, ներվի մահացմամբ պայմանավորված, հաճախ անհետանում են:

Քանի որ պրոցեդուրաների ընթացքում լնդերի մեջ անզգայացում է ներարկվում, պրոցեդուրայից ժամեր անց բուժառուի բերանը կարող է թմրել՝ դժվարացնելով ուտելը, ուստի եթե ատամնաբույժը հիվանդին չի արգելում, ապա պրոցեդուրայից մի քանի ժամ առաջ ուտելը վերականգնումը շատ ավելի արդյունավետ է դարձնում:

Բուժում սկսելուց մի քանի ժամ առաջ հաճախ խորհուրդ է տրվում ընդունել իբուպրոֆեն: Այն հակաբորբոքային ցավազրկող է, որը օգնում է թեթևացնելու ձեր այտուցը:

Չնայած բոլոր խոսակցություններին՝ արմատախողովակի  պրոցեդուրաները արդյունավետ միջոց են ատամը փրկելու և նրա գործառույթը վերականգնելու համար:      

Արմատախողովակները սովորաբար բուժում է էնդոդոնտիստը կամ ընդհանուր ատամնաբույժը մեկ կամ երկու այցի ընթացքում, սակայն ժամանակ առ ժամանակ լրացուցիչ այցելություններ են պահանջվում, քանի որ որոշ ատամներ դժվար է բուժել: Նախ պետք է ատամների ռենտգեն հետազոտության միջոցով ստուգել վնասի չափը: Ցավը վերահսկելու համար ընթացակարգն ուղեկցվում է տեղային անզգայացմամբ: Այնուհետև ատամի շուրջը՝ բերանի խոռոչում, տեղադրվում է ռետինե թիթեղ՝ ատամը թքից զերծ պահելու համար: Կարիեսը հեռացվում է, և ատամի պսակի միջով անցք է բացվում՝ պուլպային անցք մուտք գործելու համար: Ատամնաբուժական փոքր գործիքների օգնությամբ հեռացվում է վարակված կամ հիվանդ պուլպը։

Վնասված միջուկի հեռացումից հետո արմատախողովակները լվացվում և մաքրվում են: Դրանց չափերը կարող են փոխվել և ընդլայնվել՝ ավելի լավ լցոնման հասանելիություն ապահովելու համար։ Մշտական ​​լցոնումից առաջ դրանք մաքրվում են բոլոր վարակներից և չորացվում։ Երբեմն դեղամիջոցներ են ներարկվում պուլպային խցիկի և արմատային խողովակների մեջ՝ ցանկացած վարակից ազատվելու համար: Եթե ​​վարակը տարածվել է ատամից այն կողմ, ապա կարող են անհրաժեշտ լինել հակաբիոտիկներ: Արմատախողովակների բուժումից հետո ատամը պաշտպանելու, բեկորների և թքի մուտքը կանխելու համար պսակի մեջ տեղադրվում է ժամանակավոր լցոնում: Անհրաժեշտ է խուսափել այդ հատվածով կծելուց կամ ծամելուց, մինչև այն ամբողջությամբ կմշակվի և կվերականգնվի:

Մաքրվելուց և չորացնելուց հետո ժամանակն է լցնել ատամի ներսը՝ դատարկ պուլպախցիկը և արմատային խողովակները: Հնարավոր է, որ այս քայլի համար լրացուցիչ անզգայացման կարիք չլինի: Ժամանակավոր լցոնման առկայության դեպքում այն հեռացվում է՝ ատամի ներսից մուտք գործելու համար: Ատամը լցնելու համար օգտագործվում է հերմետիկ մածուկի խառնուրդ, որին հաջորդում է լցոնում՝ այն համոզումով, որ արմատային խողովակները պաշտպանված են թքից:

Արմատախողովակների բուժման վերջին քայլը ատամի վերականգնումն է: Քանի որ ատամը սովորաբար ունի մեծ լցոնում կամ թուլանում է լայնածավալ կարիեսի պատճառով, այն պետք է պաշտպանված լինի ապագա վնասներից և վերադարձվի նորմալ օգտագործման: Դա արվում է՝ ատամի վրա տեղադրելով արհեստական ​​ատամ՝ պսակ, որը սովորաբար պատրաստվում է ճենապակուց կամ մետաղի հետ միաձուլվածքից      , սակայն կարող են օգտագործվել այլ նյութեր: Ճենապակե կամ մետաղից միաձուլված պսակները կարելի է համապատասխանեցնել մյուս ատամների գույնին: Երբեմն ատամի մեջ նախ պետք է տեղադրվի մետաղական սյուն՝ կառուցվածքային ամրություն  ապահովելու և պսակը տեղում պահելու համար, եթե ատամի զգալի մասը բացակայում է: Պետք է հարցնել ատամնաբույժին կամ էնդոդոնտոլոգին վերականգնման այլ տարբերակների մասին:

Շատ կարևոր է հոգ տանել ատամների մասին արմատախողովակի բուժումից հետո վերականգնման ընթացքում:

Պետք է խուսափել պինդ սնունդ ուտելուց մինչև բուժման ավարտը:

Վերջնական բուժումից հետո վերականգնված ատամն այլևս չպետք է ցավի․ կարող է ցավել միայն մի քանի օր։

Ցանկացած անհանգստություն թեթևացնելու համար կարելի է ընդունել առանց դեղատոմսի ցավազրկողներ, ինչպիսիք են պարացետամոլը կամ իբուպրոֆենը:

Հարկ է դիմել ատամնաբույժին, եթե ցավազրկողներ ընդունելուց հետո դեռ առկա է ցավ կամ այտուց։

Շատ դեպքերում արմատախողովակի հետագա բորբոքումը կարելի է կանխել հետևյալ կերպ.

• ատամները մաքուր պահել,
• չուտել շատ քաղցր սնունդ,
• թողնել ծխելը: