Քթի ձևն ու հաճախորդի ցանկությունները մեծապես տարբերվում են։ Այս դեպքում անցկացվում է նախավիրահատական անհատական խորհրդատվություն, որի ժամանակ քննարկվում են ընթացակարգը, դրա առավելություններն ու ռիսկերը: Վիրաբույժը հարցնում է բժշկական պատմության և դեղերի մասին։ Կատարվում են ֆիզիկական հետազոտություն և լաբորատոր թեստեր՝ որոշելու հաճախորդի համապատասխանությունը վիրահատությանը: Քթի մի քանի լուսանկարներ արվում են տարբեր անկյուններից, որոնք օգտագործվում են որպես հղում վիրահատության ընթացքում և դրանից հետո՝ արդյունքը համեմատելու համար։

Նախավիրահատական խորհրդատվության ժամանակ կատարվում է ընդհանուր զննում, որը ներառում է քթի ներսի և դրսի գնահատումը: Սա թույլ է տալիս գնահատել, թե որ մեթոդներն են համապատասխանում կոնկրետ մարդու քթի համար: Սա նաև վիրահատվող բուժառուի հնարավորությունն է քննարկելու, թե ինչ է ակնկալվում վիրահատությունից, ստանալու բոլոր հարցերի պատասխանները:

HEG պլաստիկ վիրաբույժը ասում է, թե ինչ է ներառում վիրահատությունը, ռիսկերը, ինչպես նաև այն մասին, թե ինչ խնամքի կարիք կարող է լինել վիրահատությունից հետո: Տրամադրվում է նաև ուղեցույց, որը տալիս է ընթացակարգի վերաբերյալ անհրաժեշտ բոլոր տեղեկությունները: Խորհրդատվությունից հետո, լավ տեղեկացված լինելով ընթացակարգի մասին, հեշտ է որոշել՝ վիրահատվե՞լ, թե՞ ոչ։

Քթի էսթետիկ վիրահատության ժամանակ տրվում է ընդհանուր կամ տեղային անզգայացում․ պլաստիկ վիրաբույժները հիմնականում նախընտրում են նման վիրահատություններ կատարել ընդհանուր անզգայացմամբ։

 Նախքան վիրահատությունը պետք է տեղեկացնել նախորդ վիրահատությունների, օգտագործված ցանկացած դեղամիջոցի, ալերգիաների կամ առողջական խնդիրների, ինչպես նաև ծխախոտի օգտագործման  մասին։ Ցանկացած մտահոգություն պետք է քննարկվի նախքան վիրահատությունը: Բժիշկը կարող է խորհուրդ տալ, որ վիրահատությունից առաջ դադարեցնեք որոշակի դեղամիջոցների և ծխախոտի օգտագործումը, որը կարող է բարձրացնել արյունահոսության ռիսկը։

Կախված վիրահատվող բուժառուի օրգանիզմի առանձնահատկություններից՝ վիրահատությունը կարող է իրականացվել թե՛ տեղային, թե՛ ընդհանուր անզգայացմամբ: Վիրաբույժը կտրվածք է կատարում կոլումելայի կամ քթի հիմքի վրա, այնուհետև զգուշորեն հեռացնում է մաշկը աճառից կամ քթի ոսկորից՝ վերափոխելով այն: Քթի ոսկորը կամ աճառը կարող է փոփոխվել մի քանի ձևով: Վիրաբույժը կարող է կա՛մ հեռացնել հյուսվածքը, կա՛մ ավելացնել լրացուցիչ ոսկոր՝ կատարյալ տեսք ստանալու համար: Լրացուցիչ ոսկորը ստացվում է ականջներից, քթից կամ կողոսկրերից (հազվադեպ): Փոփոխությունները կատարելուց հետո քթի մաշկը նորից ձևավորվում է, և կտրվածքները կարվում են:       

 Քթի միջնապատի թեքվածության ուղղումը (սեպտոպլաստիկա) իրականացվում է բուժական նպատակներով: Այս տեսակի վիրահատությունից հետո կարելի է ազատվել շնչառական մի շարք խնդիրներից: Սեպտոպլաստիկան կարելի է դասել ոչ շատ բարդ վիրահատությունների շարքը․ այն տևում է 60-90 րոպե, և որպես կանոն հոսպիտալացնում են 1 օր:

Ռինոպլաստիկայի տարածված դեպքերը քթի սապատի, կեռ կամ շատ սուր և երկար ծայրով քթերի և այլ տեսակի թերությունների ուղղումներն են: Սա բավական բարդ վիրահատության տեսակ է և կարող է տևել 2-3 ժամ: Վիրատահությունից հետո անհրաժեշտ է նվազագույնը 1-2 օր մնալ հիվանդանոցում՝ կախված վիրահատվող բուժառուի վիճակից:

Լինում են դեպքեր, երբ վիրահատվող բուժառուի ցանկությամբ մեկ վիրահատությամբ լուծվում են թե՛ էսթետիկական, թե՛ շնչառական խնդիրները: Այսպիսի համադրված վիրահատությունը կոչվում է ռինոսեպտոպլաստիկա:

Պլաստիկ վիրահատությունից հետո քթի վրա դրվում է գիպսից ֆիքսող վիրակապ, իսկ քթանցքերում՝ տամպոններ, որոնք հեռացվում են 3-5 օր անց: Վիրահատությունից հետո բուժառուի քթի շրջանում լինում են ցավեր, այտուցներ, իսկ աչքերի տակ առաջանում են կապտուկներ: Այս ամենը, սակայն, երկար չի տևում՝ հիմնականում 7-10 օր: Խորհուրդ է տրվում այս փոքր-ինչ բարդ շրջանն անցկացնել տանը:

Եթե վիրահատական և հետվիրահատական բարդություններ չկան, ապա վերականգնման փուլը հիմնականում արագ է ընթանում: Վիրատահությունից մոտ 10-15 օր անց քիթն ընդունում է էսթետիկական գեղեցիկ տեսք: Սակայն վերջնական արդյունքը տեսանելի է լինում 6-10, երբեմն նույնիսկ 20 ամիսների ընթացքում: Իսկ մինչ այդ պացիենտին տրվում են որոշակի ցուցումներ՝ հնարավոր բարդություններից խուսափելու համար:

Մասնավորապես շուրջ կես տարի անհրաժեշտ է խուսափել արևի ուղիղ ճառագայթներից, շոգից, ցրտից և ակնոց կրելուց: Կախված դեպքի առանձնահատկություններից՝ կարող են որոշ նշանակումներ կատարվել և տրվել լրացուցիչ ցուցումներ: